Një grabitje spektakolare tronditi mëngjesin e së hënës autostradën që lidh Leccen me Brindisin në Itali. Sipas raportimeve, një grup grabitësish të maskuar ndaloi qarkullimin duke përdorur makina të kamufluara si automjete policie, ndërsa vetë ishin veshur si agjentë sigurie që transportonin para.
Pamjet e publikuara nga mediat italiane tregojnë momentin kur mjeti i blinduar i kompanisë Battistolli ndalet në mes të rrugës. Autorët e armatosur hapën blindin me eksplozivë dhe më pas u larguan me shpejtësi.
Policia nisi menjëherë një operacion të gjerë në zonë. Shpejt u gjet e braktisur një Alfa Romeo që ishte përdorur gjatë grabitjes, ndërsa pranë saj u arrestua një burrë me kapuç, i paarmatosur. Një person i dytë, gjithashtu i maskuar, u kap më vonë teksa tentonte të largohej në këmbë. Një makinë tip xhip, që dyshohet se ishte pjesë e arratisjes së grabitësve, u sekuestrua gjithashtu.
Autoritetet po dyshojnë se grupi mund të ketë përfshirë më shumë se katër persona dhe kërkimet për të kapur të tjerët vijojnë. Policia italiane konfirmon se hetimet janë në vazhdim për të identifikuar të gjithë të përfshirët dhe për të zbardhur detajet e grabitjes.
