Detaje të reja janë zbardhur lidhur me shpërthimin e fuqishëm që tronditi një pallat në qytetin e Elbasanit, ku humbën jetën dy persona dhe dhjetë të tjerë mbetën të plagosur. Sipas njoftimit të Policisë së Shtetit, dyshohet paraprakisht se shkak i shpërthimit dhe zjarrit që pasoi ka qenë prania e një sasie të madhe gazi në banesën e një 69-vjeçari.
Viktimat janë identifikuar si Hamit Ibro, 69 vjeç, pronari i banesës ku dyshohet se nisi shpërthimi, dhe një grua 82-vjeçare, e cila humbi jetën si pasojë e ngjarjes. Trupi i pajetë i 69-vjeçarit u gjet rreth orës 00:40, pas disa orësh kërkimesh intensive nga ekipet e Policisë, Forcave të Armatosura dhe shërbimeve të emergjencës.
Ndërkohë, dhjetë banorë të tjerë të pallatit kanë marrë ndihmë mjekësore pas plagosjes dhe problemeve të shkaktuara nga shpërthimi. Fatmirësisht, sipas policisë, ata janë larguar nga ambientet spitalore.
Ngjarja ka shkaktuar dëme të konsiderueshme materiale dhe ka ngritur shqetësime serioze për sigurinë e ndërtesës. Për shkak të dëmtimeve të rënda strukturore, ndërhyrja në objekt ka qenë e vështirë dhe ekipet e specializuara janë angazhuar në operacionin e kërkim-shpëtimit.
Grupi hetimor, nën drejtimin e Prokurorisë së Elbasanit, po vijon punën për dokumentimin e plotë të rrethanave. Dyshimi për rrjedhje gazi mbetet shkaku paraprak i ngjarjes, ndërsa përfundimet përfundimtare do të përcaktohen nga hetimet dhe ekspertizat përkatëse.
Leave a Reply