Ka përfunduar takimi në mes të kryetarit të Lëvizjes Vetëvendosje Albin Kurti dhe kryetarit të Lidhjes Demokratike të Kosovës, Lumir Abdixhiku.
Pas takimit Kurti nuk është deklaruar për media, ndërsa Abdixhiku ka thënë se do të përpiqen që të takohen sërish, por se numrat në Kuvend dihen tashmë. Ai ka thënë se vendi po shkon drejt zgjedhjeve të reja.
Abdixhiku ka thënë se kanë diskutuar për zhvillimet e fundit.
“Njoftim i rregullt pas zhvillimeve në të dy partitë, siç e do rendi do të ketë procese diskutuese, do të njoftojmë edhe zyrtarisht njeri-tjetrin për zhvillimet partiake, këtë e bëra për takimet që kanë ndodhur dje e njoftova zyrtarisht”, është shprehur Abdixhiku.
Ai nuk komentoi vendimin e gjashtë deputetëve të LDK-së për të mos e mbështetur kandidaturën e Sjediut.
“Tash duhet t’i pyesni ata që kanë vendosur ta dërgojnë Kosovën në një situatë të paqartë”, ka thënë Abdixhiku.
I pyetur nëse do të vazhdojnë takimet mes tij dhe Kurtit, Abdixhiku është përgjigjur se përpjekjet do të ketë, por sipas tij, numrat për momentin nuk janë për të zgjedhur presidentin e vendit.
Sa i përket takimeve me partitë e tjera politike, Abdixhiku ka thënë se gjë e tillë do të ishte e mirëseardhur, por që sipas tij, ato janë distancuar nga një proces i tillë.
Takimi është zhvilluar pasi të martën (1 shtator) 6 prej 18 deputetëve të kLDK-së kanë deklaruar se nuk do ta mbështesin kandidaturën e Bekim Sejdiut për president.
Abdixhiku të martën pas mbledhjes së Grupit Parlamentar tha se Hykmete Bajrami, Avdullah Hoti, Kujtim Shala, Arben Gashi, Armend Zemaj e Janina Ymeri janë deklaruar se nuk do ta votojnë Sejdiun.
E po të martën u takua edhe Grupin Parlamentar i Vetëvendosjes. Pas takimit Kurti tha se në këtë grup të gjithë ishin të pajtimit për kandidaturën e Sejdiut, por tha se me refuzimin e 6 deputetëve të LDK-së numri maksimal i votave që mund të sigurojnë është 74.
Kurti tha se marrëveshja politike për të është ende valide, por shtoi se duhet të takohet sërish me Abdixhikun dhe më pas edhe me Kryesinë e Vetëvendosjes.
Bekim Sejdiu u propozua të hënën si kandidat për president pas dakordimit të arritur mes Vetëvendosjes dhe LDK-së
