Në Aleancën Kosovare të Bizneseve ka qëndruar prefekti i Tiranës, Shkëlqim Hajdari, ku me kryetarin Agim Shahinin dhe përfaqësues të bizneseve kanë biseduar lidhur me eliminimin e barrierave ekonomike.
Kryetari i AKB-së, theksoi se bashkëpunimi dhe rritja e investimeve ka rëndësi shumë të madhe për dy vendet.
Ai kërkoi nga institucionet si në Kosovë ashtu edhe në Shqipëri për heqjen e barrierave për biznesit andej e këndej kufirit.
“Raportet ekonomike mes bizneseve të Kosovës dhe Shqipërisë janë shumë të mira, ato vëllazërore edhe më të mira, por ato ndërshtetërore duhet të avancohen më shumë”, tha Shahini.
Prefekti i Tiranës, Shkëlqim Hajdari, tha se të gjithë duhet të ndihmojnë sadopak, duke qenë të bindur se prodhimi cilësor në çdo fushë të veprimtarisë ekonomike dhe sipërmarrjes në territoret tona i shërben zhvillimit të ekonomive dhe prosperitetit të shteteve të ndara, territoreve të ndara shqiptare, por edhe kombit në tërësi.
“Dera ime do të jetë e hapur pë bizneset të cilat hasin në barriera për eliminimin e tyre, në mënyrë që sipërmarrësit shqiptar mos të përballen me byrokraci e pritje të kota”, tha prefekti Hajdari.
