Një 25-vjeçar shqiptar është arrestuar në qytetin e Pylosit, në Greqi, pasi dyshohet se ka sulmuar një berber dhe i ka dëmtuar automjetin.
Sipas njoftimit të policisë greke, ngjarja ka ndodhur pasditen e 7 shkurtit. Fillimisht, i riu kishte shkuar si klient në berberhane dhe ishte qethur nga pronari, një 51-vjeçar.
Më pas, për arsye ende të paqarta, ai është rikthyer në ambientet e berberhanes i pajisur me një shkop metalik të palosshëm.
Autoritetet bëjnë me dije se 25-vjeçari fillimisht ka ofenduar berberin dhe më pas e ka goditur me shkop, duke i shkaktuar lëndime trupore. Po ashtu, ai dyshohet se ka dëmtuar edhe automjetin në pronësi të 51-vjeçarit.
