Fundjava ka sjellë një tjetër rritje të ndjeshme të lëvizjeve në Pikën Kufitare të Morinit, ku mijëra qytetarë nga Kosova po zgjedhin Shqipërinë si destinacion për pushimet verore.
Sipas të dhënave të autoriteteve kufitare, gjatë 24 orëve të fundit janë regjistruar 26.921 hyrje-dalje shtetasish mes Kosovës dhe Shqipërisë, ndërsa numri i automjeteve që kanë kaluar kufirin ka arritur në 8.022.
Destinacioni kryesor i udhëtarëve mbetet bregdeti shqiptar, ku pushues të shumtë po i drejtohen zonave turistike për të kaluar fundjavën ose për të nisur pushimet e sezonit veror. Shumë prej tyre shprehen se Shqipëria mbetet zgjedhja e parë për shkak të afërsisë, plazheve dhe ofertës turistike.
Përballë fluksit të lartë, Pika Kufitare e Morinit po operon me 12 sportele në hyrje dhe dalje.
Autoritetet kufitare parashikojnë që fluksi të vijojë të mbetet i lartë edhe në ditët në vijim, ndërsa sezoni turistik po hyn në periudhën e tij më intensive dhe numri i pushuesve që zgjedhin bregdetin shqiptar vazhdon të rritet.
