Legjenda e futbollit sllovak, Lubomir Moravcik, ka analizuar përballjen e ardhshme mes Sllovakisë dhe Kosovës, duke paralajmëruar një ndeshje mjaft të fortë.
Dy përfaqësueset do të ndeshen të enjten në stadiumin kombëtar në Bratislavë, me fillim nga ora 20:45, në një duel vendimtar për fazën “play-off”.
“Dardanët” synojnë një rezultat pozitiv për të siguruar kalimin në finale, ku mund të përballen me fituesin e çiftit tjetër Turqi-Rumani.
Para kësaj sfide, Moravçik ka pranuar se kishte një perceptim të gabuar për nivelin e kundërshtarit.
Ai theksoi se fillimisht mendonte që Kosova kishte vetëm disa lojtarë cilësorë, por realiteti, sipas tij, është ndryshe.
“Mendova se kishin dy ose tre yje si ne, por jo. Formacioni i tyre është i balancuar dhe me cilësi. Rezultatet në grup flasin vetë”, është shprehur ai.
Ish-mesfushori vlerësoi gjithashtu faktin që shumë lojtarë të Kosovës aktivizohen në kampionate të forta europiane, çka i bën më të përgatitur për ndeshje të tilla.
Megjithatë, ai theksoi se avantazhi i fushës mund të luajë rol kyç për përfaqësuesen vendase.
“Nuk mendojmë se do të vijë një Kosovë e vogël. Do të jetë një ndeshje shumë e vështirë”, përfundoi Moravçik, duke rritur pritshmëritë për një duel të fortë dhe të luftuar deri në fund.
