Seanca për Projektbuxhetin 2026, është shtyrë për të hënën, në orën 10:00.
Vendimi erdhi pas konsultës së Kryeparlamentares Albulena Haxhiu me shefat e grupeve parlamentare, meqë opozita kritikoi procedurën e ndjekur për këtë projektligj.
Haxhiu, deklaroi se leximi i parë është paraparë për të hënën, teksa leximi i dytë për të premten.
Kreu i PDK’së, Bedri Hamza, i kërkoi Qeverisë tërheqjen e projektligjit.
“Tërhiqeni dhe sillne pas tri dite, jeni të bindur që kemi me ia votu që të hyjë në procedurë të përshpejtuar”, deklaroi Hamza.
Ai i LDK’së, Lumir Abdixhiku, tha se nuk e mbështesin meqë katër ministra nuk kanë buxhet fare.
Kritikoi edhe mospraninë e Kryeministrit Albin Kurti në seancë, për ligjin më të rëndësishëm.
“Bëhuni më serioz. Jepuni kohë deputetëve ta lexojnë tri-katër ditë. Përshtateni me kabinetin tuaj fillimisht. Përshtateni me komunat. Prishtina e ka miratuar buxhetin qe sa kohë, por ju nuk e keni në buxhet. Është mirë me qenë edhe zoti i shtëpisë këtu, kryeministri”, deklaroi Abdixhiku.
Kryeparlamentarja Albulena Haxhiu sqaroi se ai ndodhet në Munich për Konferencën e Sigurisë.
Nga AAK vlerësuan se nuk është urgjencë miratimi i buxhetit sot, duke kujtuar vendimin e djeshëm për zgjatje buxhetore edhe për muajin mars.
Ministri i Financave, Hekuran Murati, premtoi rishikim të buxhetit muajin e ardhshëm.
