Ylli i Real Madridit dhe i përfaqësueses së Turqisë, Arda Guler, ka folur në prag të përballjes vendimtare ndaj Kosovës në finalen e playoff-it, duke e bërë të qartë objektivin e skuadrës së tij.
Mesfushori i talentuar theksoi se Turqia nuk mendon për asnjë rezultat tjetër përveç kualifikimit në Botëror, duke e konsideruar këtë si një mision kombëtar.
“Objektivi ynë i vetëm dhe kryesor është të kualifikohemi në Kupën e Botës. Shpresojmë t’i bëjmë tifozët tanë të lumtur,” u shpreh fillimisht ai.
Ai kujtoi gjithashtu se sa e rëndësishme është kjo arritje për vendin e tij, duke theksuar se Turqia mungon në një Botëror që nga viti 2002.
“Unë nuk kisha lindur ende kur morëm pjesë për herë të fundit në Kupën e Botës, por e di shumë mirë rëndësinë që ka ky kompeticion për vendin tonë”, shtoi ai.
Pas zhgënjimit në Europian, motivimi i skuadrës turke është rritur ndjeshëm, me fokus të plotë rikthimin në skenën më të madhe të futbollit botëror.
Ndërkohë, përballja ndaj Kosovës pritet të jetë një sfidë e fortë, sidomos duke marrë parasysh formën e mirë të “Dardanëve”.
Ndeshja finale mes Turqisë dhe Kosovës do të zhvillohet në stadiumin “Fadil Vokrri” të martën duke filluar nga ora 20:45, në një atmosferë që pritet të jetë elektrizuese.
