Ajo nuk është Glenda Jackson. Nuk ka marrë dy Oscars, dhe, në kulm të suksesit, t’i shtë nën sqetull të vazhdojë rrugën të drejtojë komisione parlamentare, të amandamentojë ligje, të ruajë kulturën nga marketizimi, të mirëmbajë pulsin e jetës së teatrove lokale e rajonale, të shtyjë përpara fonde të domosdoshme për artin dhe kulturën, as të ruajë RTK-në (si Glenda BBC-në) si specie në rrezik. Asgjë nga këto. Adriana Matoshi e Vetëvendosjes, me disponim dhe veshje të një Arlekine dhe Skaramuçe, tipike edhe për rolet e saj në zejën e karrierës aktreske/parlamentare, pranon mesazhe nga Dejona Mihali, kënd të godasë (si rasti me Ilir Mirenën) e kapur nga kamera në rol të të ventrilokuarës online. Me zgjedhjet parlamentare afër, 45/6 vjeçarja nga Gjilani synon të zgjidhet me çdo kusht për një term të tretë prej aktore-legjislatore, pa një regjistër puneje të ligjvënëses për të treguar, por me shumë të shara të ekzekutuara ndaj kundërshtarëve politikë. “Nuk ka mo kështu loqka, me vjedh, me hajna”, është linja standarde e oracioneve të saj politike. Me përleshje llafesh, gjuhë të ngarkuar, performancë polarizuese, Matoshi e ka trupëzuar dimensionin më “domethënës” të tregimit zgjedhor të Vetëvendosjes: “Ata” si “hajna dhe të korruptuar”, dhe “Ne” si përfaqësuesit origjinalë dhe të pahelmuar të popullit të çiltër. “Ata” që kanë “kumari me Serbinë” dhe “Ne” që e “çliruam veriun” dhe si “shprehja e shqiptarisë” në përfaqësimin politik. Vetëvendosje, sytë, megjithatë, del t’i ketë edhe te një AAK që nuk e kalon pragun. Kjo si një gjë e mirëseardhun për VV-në për rishpërndarje të mandateve në favor të VV-së.
Matoshi i përshkroi “kumari” Ramush Haradinajt me Millan Radojçiqin, autorit të sulmit paraushtarak në Banjskë të Zveçanit. “U desht me ardh Albini me ju çkap”. Matoshi i kalon oktavat e gjuhës zgjedhore, duke i për shkruar “kumbari te ngushtë” familjes Haradinaj, me regjistër të madh atdhetarie, me Radojçiqët; mbase semantikisht duke mos e pasur të qartë çka nënkupton kumbaria. “Faktet nuk fshihen ramush. Ju keni pas kumari t’ngusht me kriminel si Radojçiqi, u desht me ardh Albin me ju çkap”, shkruan ajo dhe publikon një videomontazh.
Ramush Haradinaj është bërë shënjestër e madhe online për t’i përshkruar përputhshmëri politike me Listën Serbe, për çka, vetë ai, ditëve të fundit pati fjalë tonike si kundërpërgjigje, që “këta njerëz që s’illen kështu me mu, nuk kanë me pa dritë, as në politikë, as në kurrgjë”. Moskalimi i pragut nga AAK do ta favorizonte me të madhe Vetëvendosjen në rishpërndarje të mandatave, siç ishte rasti i sondazhit të fundit të UBO-s, ku ndonëse VV kishte rënie në 37-38%, arrinte të siguronte 50 ulëse, dy ulëse më shumë se më 9 shkurt, ndonëse me 5% më pak.
“E t’më thuash se jam me Listën Serbe? Me t’ju thanë: a e din çka? Jam. Se ti je më i zi se ata kur flet kështu. Kush flet kështu nuk është në rregull. Nuk falen këto. Ai që i thotë Ramushit kështu, beso është argat i dreqit. Mos more. Dy vëllazën i kam në tokë, jam kanë aty kur janë vra. Nga e dita e parë tre e fundit nuk e kam lëshu pushkën prej dore. Kush je ti m’i thanë këto fjalë? Me kon je ti që po i thu këto fjalë? Ky është një lloj mallkimi për ta, kjo çka po bëjnë. Se unë e kam një shprehje…besoni, si në vend të shenjtë m’e më prek. Nuk kanë me pa ditë ata njerëz që sillen kështu me më, as në politikë, e as në kurrgjë, kurrë. Sepse janë do vlera që nuk o mirë me i prek në atë bazë”, tha Haradinaj ditë më parë në “Arbëria TV”.
Kurti e çoi në oktavën me të lartë
Me të marrë ‘besimin’ absolut të Vetëvendosjes si kandidat i partisë për kryeministër në zgjedhjet e jashtëzakonshme, çështjen e përshkruarjes së Listës Serbe te mëndafshi politik i partive ish-opozitare, Albin Kurti e çoi në oktavat më të larta.
“Është e frikshme përputhja e tyre me Listën Serbe”, tha Kurti.
Lista Serbe, si parti degë e SNS-së së Aleksandar Vuçiqit, pas kësaj fjalie të Kurtit u bë lajtmotiv i zgjeruar nga profilet e rreme në Facebook e deri te deputetët e Vetëvendosjes.
Dhe jo veç “sinkronizim me Listën Serbe në Kuvend”, tha Kurti, por “edhe në KQZ, për ta ndaluar morgatën për të votuar”.
“Në thelb, të dashur qytetarë, kjo opozitë po e pengon mërgatën në ushtrimin e së drejtës së saj kushtetuese për të votuar dhe fatkeqësisht këtë po e bën në sinkronizim me Listën Serbe. Përputhja në votime e opozitës kosovare me Listën Serbe, për besë është e frikshme. Pra, nuk është duke ndodhur ky sinkronizim veç në Kuvend të Republikës, ku votonin kundër Albulenës, votonin kundër meje, votonin kundër Glaukut. Veç vërejeni me kujdes!
Kur ishte në pyetje Lista Serbe, maksimumi i kundërshtimit të tyre ishte abstenimi. Këta kundër Listës Serbe nuk votojnë. Maksimumi është abstenimi. Ndërkaq zelli me të cilin votojnë kundër Albulenës, Glaukut edhe meje, ky sinkronizim në Kuvend të Republikës, në fakt është i përcjellur edhe në institucione të tjera siç është Komisioni Qendror Zgjedhor. Prandaj këto zgjedhje janë tejet të rëndësishme dhe nevojitet syçelësi, dhe nevojitet pjesëmarrje massive”, tha Albin Kurti,.