Sot janë bërë një vit nga sulmi që u cilësua terrorist në kanalin e Ibër-Lepencit. Ishte 29 nëntori i vitit 2024, kur Ibër-Lepenci u dëmtua rëndë nga siç u tha nga mbi 15 kilogram eksploziv. Ishte Drejtori i Policisë së Kosovës, Gazmend Hoxha, i cili tha se 15 deri në 20 kilogram, u përdorën në këtë sulm. Por, tash kur kanë kaluar një vit, ende nuk ka aktakuzë në lidhje me rastin. Në paraburgim ndodhen dy vëllezërit Vuçentijeviq, të cilët ngarkohen me akuzën e ‘terrorizmit’, ‘cenimit të rendit kushtetues dhe sigurisë publike.’
Drejtori i Institutit për Drejtësi në Kosovë, në një prononcim për REL, kritikoi prokurorinë, pasi sipas tij hetimi duhet të jetë profesional.
“Prokuroria duhet të jetë më efikase, duhet ta trajtoj rastin si prioritar, ndonëse është ende brenda afatit ligjor, prej dy vjetësh për zhvillimin e hetimeve.”
Me anë të një reagimi në Facebook, kryeministri në detyrë, Albin Kurti, ka ri-kujtuar sulmin e Ibër-Lepencit, duke theksuar se organet e vendit, arritën ta sanojnë dëmin.
“Pas bastisjeve në veri të Kosovës, në lidhje me këtë sulm, ishin konfiskuar armë, uniforma dhe pajisje të ndryshme, si dhe ishin gjetur emblema ruse dhe serbe të strukturave të inteligjencës, ushtrisë dhe sigurisë. Edhe sot, ato janë dëshmi të qarta për përfshirjen e grupeve ekstremiste dhe terroriste serbo-ruse, me lidhje të forta në Serbi, që synim e kanë destabilizimin e vendit tonë dhe krijimin e një mjedisi të pasigurt në rajon.” – shkroi ndër të tjera Kurti.
Në hetimet mbi atë se çka ndodhi një vit më parë, u përfshi edhe FBI. Ambasadori i atëhershëm i ShBA-së në Beograd, kishte deklaruar se ‘ShBA-ja nuk sheh asnjë provë, që çon drejt Beogradit në lidhje me këtë rast”.
Përfshirjen e FBI në hetime e pati konfirmuar edhe ambasadori i ShBA-ve në Kosovë, atëkohë, Jeff Hoëenier, i cili kishte deklaruar se, “nuk duhet përjashtuar asnjë grup apo shtet nga hetimi”.
Ndryshe, veç dy ditë pa u bërë një vit nga sulmi, në kanalin e Ibër-Lepencit është raportuar edhe një dëmtim tjetër, por kësaj rradhe më sipërfaqësor. Dëmi i shkakutar i këtij sulmi të fundit, u tha të jetë deri në 4 mijë euro.